感激

今日 Zel 有個客突然打電話嚟，佢話好感激 Zel，事沿年幾前佢想轉工，搵 Zel 幫佢睇星盤，當時佢本來想揀佢個 friend 間公司，人工比而家呢份高好多，但係 Zel 睇佢個星盤，佢而家間公司同佢比較夾，建議佢揀而家呢份工，最後佢都聽咗 Zel 講，揀咗佢而家呢份。今日佢收到風，佢個 friend 間公司會執笠，有無糧出都未知，所以佢特登打嚟多謝 Zel。其實只係一個建議，Zel 成日都話，所有嘢最終都係自己揀。

占星預測運程

年頭 Zel 預測我公司，响九月會有人事變動，初初我都唔多信，今日終於收倒風，我老闆九月尾調去 headquarter，我老闆嘅老闆亦都會調職，接任人選仲未公報，但係小道消息就周圍飛。

開張啦！

Zel 嘅 centre 尋日開張啦！請咗成班 les friend 嚟，warm up the place，地方淺窄，招呼唔到，多謝光臨！

或者遲啲攪啲 gathering，大家可以嚟聚吓腳、傾吓偈。

如火如荼

呢排真係好忙，除咗番新工之外，Zel 嘅 centre 裝修又如火如荼，地毯、牆紙、窗簾，揀料揀款，日日催住個裝修師傅，希望五月尾可以順利開張啦！

相信自己

上個禮拜其中一個客打嚟話，因為公司提出一個苛刻條件，佢唔知好唔好接受，希望我可以幫佢開次牌。雖然我一直都唔希望做占卜，但係佢今次真係好迷茫，最後我都應承咗。

整副牌出嚟嘅 message 係話， 只要佢勇敢啲向上司爭取，佢會得到佢想要嘅嘢。所以我就同佢分析佢嘅特質，幫佢自己定立談判嘅目標同低線，鼓勵佢要相信自己，同埋肯定自己嘅能力。

終於佢今日打俾我，話公司已經接受咗佢嘅要求，仲係由公司嘅高層直接通知佢添！

我都戥佢非常開心，唔單止係幫倒佢，仲係再一次得到肯定，只要可以了解自己多啲，係可以去爭取自己想要嘅嘢！

占卜

當 Win 希望我响呢度寫 post，我又唔識打中文，呢篇 post 都係我講 Win 打。其實我都唔知寫咩好，不如寫一寫我對占卜嘅睇法。

雖然我對 Astrology (占星學) 同 Aura-Soma (靈性彩油) 嘅研究甚為熱衷，但係我會視之為一種，可以幫助了解自己嘅工具，而唔係坊間吹噓為，能夠預知過去未來嘅鬼秘怪談。其實呢類由遠古留存至今嘅學說，能夠經得起時間嘅考驗，必定有其一套根據，而整個大自然界 (包括人性)，都有着一套運行定律。

成日都有人問我：「我同佢夾唔夾？」，如果齋睇我同 Win 嘅 birthchart (星宮命盤)，係極度唔夾嘅一對情侶，其實呢個世界上係無 perfect match，關鍵係雙方需要點樣去夾。

正所謂：「知己知彼，百戰百勝」，如果你能夠了解自己，了解對方，兩個人就可以搵倒一個，雙方都可以接受嘅方式，相知、相愛、相處。從而家起，嘗試去了解真正嘅自己，你會有意想不到嘅領會。