FAQ

啱啱過咗十七週年紀念，即係呢個 blog 已經一歲啦，自從舊年十六週年開咗個 blog 之後，响網上同現實，都識咗啲新朋友，好多時當佢哋知道我哋一齊咗十六年，佢哋都會問：「點解可以咁耐嘅？」「唔悶架咩？」「有咩相處之道呀？」 其實一時三刻，我哋都好難答到。

我就嘗試响度回答吓，一啲比較簡單嘅問題先。

問：你哋係點識架？
答：如果有睇之前個訪問都知道，我哋其實係同一間幼稚園、小學同中學，但係咁多年都從未試過同班，亦都從來無傾過偈。 後來去到澳洲先撞番，又再做番同學，日久生情．．．．．

問：你哋屋企人知唔知呀？
答：我哋雙方家長、兄弟姊妹，同埋一啲好朋友都知道，佢哋全部都接受咗。

問：你哋係咪一齊住呀？
答：我哋大學時期，已經同啲朋友一齊租屋，當時係响房入面同居囉。我哋正式兩個人自己住一間屋，就係出咗嚟做嘢之後，到而家都十幾年喇。

問：你哋中間有無分開過，後來又復合番呢？
答：我哋十幾年嚟都無分開過，咁當然間中鬧吓交就梗會有啦。

問：你哋係咩星座架？點解可以咁夾嘅？
答：之前 Zel 都 post 過，其實我哋兩個嘅 birthchart 係唔夾，不過如果真係鍾意對方嘅話，總會搵倒一個，雙方都可以接受嘅方式去相處嘅。