端午節假期得我一個人

今日雖然係假期唔駛番工，但係就得我一個人，留响屋企上網。佢去咗邊？佢今日 fully booked 呀，就連晏晝同晚飯都陪唔倒我食。

最初佢研究呢門學問嘅時候，係希望令自己更了解自己，更了解對方，大家嘅感情亦都更進步、更穩固。

後來發現其實身邊朋友，對於自身同感情，以至同其他人嘅關係，都覺得好迷茫，畢竟我哋呢個圈嘅姊妹，比起其他人需要承擔更多額外嘅壓力。所以佢開始嘗試用呢套系統，希望可以幫倒啲朋友，自此佢就變得越嚟越忙。

話雖如此，見倒佢可以用自己嘅興趣幫人，而且嗰啲人亦覺得呢套系統幫倒佢哋，又的確係幾開心嘅，之所以我而家咪得閒寫吓 Blog 囉！

車房

今日攞架車去朋友介紹嘅車房打價，師傅睇咗一陣就開價二千五蚊(原廠食水真係深)，仲話好簡單，兩三日就可以搞掂，我問佢唔駛換 bumper 咩，佢話爆咗少少嗻，整番噴番油就得，當佢睇完惗住關度尾門時，發現關唔倒嘅時候，佢非常之唔抵得，兩三吓手勢就幫我整番個鎖。

朋友話佢自己架車都係俾佢整，非常交帶。所以我決定交俾佢，點知佢話：「聼日係假期，不如你揸住先，橫掂又幫你整番個鎖咯，到時你再俾電話我約時間啦。」

嘩！原來啲車房咁忙架！

舊朋友

今日响一個好偶然嘅情況下，撞番一個識咗好耐但又好耐冇見嘅朋友，因為佢正在忙緊另外一啲嘢，而且又有其他人响度，所以唔係咁方便，大家傾咗幾句，我倆就離開咗喇。感覺雖然有啲生疏，但係佢都好主動問我哋攞電話號碼。

有飯食

本來今晚要自己一個人食飯，諗住自己一個求其去 Super Sandwich 搞掂就算，要咗份三文治餐，包括三文治、湯同咖啡，當一個漂亮嘅女侍應搬嚟一般熱騰騰嘅食物時，我個手機響起，朋友問：「你冇收倒 email 咩？請你食飯都唔到，咁唔俾面呀？」

吓！點解咁大懵，有人請食飯都會唔記得，嗱嗱聲叫番嗰位女侍應幫我 pack 起佢，連聲講唔好意思，然後即刻趕去赴會。

至於袋 takeaway 咪變咗我第二日份早餐囉！

撞車

唉！無啦啦倒車時撞咗個尾，個 bumper 同度尾門都凹咗，搞到而家個尾門都關唔倒，激死！

雖然只係 panel job，但係我問過原廠至少要七千蚊以上，唯有周圍格吓價啦！

我屋企嗰個神婆一啲都唔覺得驚訝，仲安慰番我轉頭，佢話佢一早算到架車出事，最緊要係個人無事嗻。

唉！唯有係咁惗啦。

一樣米養百樣人

呢個世界真係咩人都有，我都係第一次聽見 cafe 可以講價，你估响街市買菜呀。

話說有班人去到一間 cafe 度，但係就想飲酒喎，問老闆有無啤酒，當然係無啦，又問可唔可以自己帶支酒去，老闆話收番人頭費 $30 一個人，不過佢哋覺得唔抵，所以佢哋決定就咁現場 order，點知佢哋竟然問有無買二送一 .....

我真係覺得好奇怪，點解啲人可以問得出口呢？人哋打開門口做生意，收你三十蚊杯嘢飲，俾你坐足成晚，仲要講價？

女同志對性賀爾蒙反應近似男性

轉載自五月十日《都市日報》

科學界一直有爭論同性戀是生理還是心理因素導致，不過瑞典提出一份新的研究報告指出，女同志大腦對性賀爾蒙的反應，與一般異性戀女性不同，反而與異性戀男性的反應比較相似。

英國 《衛報 》引述美國 《國家科學院學報 》報道，一個瑞典研究小組發現，女性同性戀者的大腦對賀爾蒙的反應與正常女性不同。這個研究小組對三組志願者進行了測試。研究員在給這些志願者嗅女性和男性賀爾蒙及四種普通氣味後，對她們的大腦進行掃瞄。

研究發現異性戀女性對男性和女性賀爾蒙產生的愉悅感程序相等，而女性同性戀者則和異性戀男性一樣，比較喜歡女性賀爾蒙，討厭男性賀爾蒙；而女性異性戀則比較討厭女性賀爾蒙勝於男性賀爾蒙。

這個發現與此前一項研究結果相呼應。這三組各有十二名健康、沒有在服藥，慣用右手且對愛滋病毒呈陰性反應的受試者。

同一個研究團隊一年前曾提出類似的研究。那項研究結果表明，男同性戀者大腦對性賀爾蒙的反應與正常男性不同，而且這種差異更為顯著。研究小組還發現，女性同性戀者對性賀爾蒙的反應與正常男性雖然不盡相同，但也有類似之處。

醫學界人士說，這些發現表明，同性戀可能由先天生理原因引起，並非學習得來的行為。

這份研究報告會於今日在美國 《國家科學院學報 》發表。

夏天到啦！

今日真係好熱呀，lunch time 出去食個 lunch 、行去銀行入張票，就搞到成身大汗，夏天到啦！第一件事要做嘅係剪頭髮！

十六年

在你的學業生涯，十六年剛好足夠完成你的小學、中學及大學。如果你有八十歲命，十六年剛巧是你人生的五份一。而我就跟她渡過了十六個寒暑，真是很不容易，經歷了無數波折，今天總算是安定下來。

回想十六年，兩小無猜，曾經有過多少冷言冷語，有過多少責備嘰諷，有過多少可憐同情，人間冷暖，見過了，也習慣了。今時今日，雖然尚未為大多數所接受及認同，但家人和圈外要好朋友都給了我們肯定，這也是我們最大的滿足。

其實，我們日常生活跟普通家庭沒有多大分別，平日我外出工作，她在家打點一切，假日兩口子打球、逛街，間中相約朋友聚會，過時過節，到雙方家裹吃飯。當然，所有的一切都得來不易，我倆經過多年努力，才能到今天。

現實是時間不可能改變一切，但你可以用時間去證明你們的真愛，至於家人朋友會否改變他們的態度，就全賴你們的真誠能否打動他們啦。而我自己亦相信時間是一個最中肯的評判，因為時間巨輪不會為任何原因而停下來。

從過去到現在，我都覺得自己非常幸福，因為有她相伴了十六年。未來，我希望亦很有信心，可以跟她繼續走下去，「執子之手，與子偕老」，好老套，但真心。

在這個復活節，我們的十六周年，讓我跟那個寧願放棄事業，全心全意照顧這個家的她，說一聲：「多謝你，我愛你。」

搬過嚟

啲 friend 話 Blogger 好啲喎，所以我就決定搬過嚟定居啦！