生日派對

成個禮拜無寫 blog，因為我要籌備我 partner 嘅生日派對呀！

先嚟嘅係乳豬全體晚飯，我 partner 恨咗好耐，要湊夠人先有得食嘛，卒之超額完成，一間房兩圍，然後就梗係直落啦。

尋晚除咗一啲識咗好耐嘅 friend 之外，我仲邀請咗啲過往呢年所識又啱傾嘅 les friend，雖然有啲人要番工嚟唔倒，但係我哋有三十一個人，可以包倒個場自己玩。除咗例牌嘅唱 K 同煙酒之外，我仲帶咗啲遊戲去，考考佢哋嘅智慧同體力。

我 partner 就肥「女」啦，收到好多禮物，仲有一個 friend 特登整咗個 blue berry cheese cake 嚟呀，而我呢啲唔識整，咪唯有買囉，一個非常之有身材嘅蛋糕。Click 去睇相 Birthday

話時話，寫咗咁耐 blog，我好似未正式介紹過我 partner 添，不過如果睇過之前篇訪問，都會知道佢叫 Zel，等我試吓邀請佢寫番篇 post，同大家見吓面先。

雖然我哋大部份 friend 都已經有 partner，仲有啲平時絕少出嚟，但係見倒有啲第一次識都咁啱傾，直頭有「一見如故」feel，我哋兩個就最開心。希望繼續搞不同類型嘅活動，大家可以識多啲朋友，有開心嘢可以分享吓，有唔開心嘢大家又可以互相扶持吓，呢個圈已經咁難，我哋要團結啲呀！