Shell 慳油大行動

星期日我哋去咗參加 「Shell 慳油大行動」 嘅比賽，雖然攞唔倒獎，但係好好玩，我 partner 就慘啲，全程都無得開冷氣，好彩嗰日唔係好熱嗻。

今年响白石度舉行，由白石 --> 大埔 --> 粉嶺 --> 元朗，再返回白石，全長 94 公里，限時三個鐘。出發前，Shell 免費幫每架參賽車入滿一缸油，然後按限定時間行完指定路線，經過預設嘅 check point，番去終點站，再免費入滿油缸，大會利用參賽車嘅行車里數，同埋終點站嘅入油量，嚟計算平均耗油量。

全場得好少女司機，我估計埋我，可能得十個女仔，點知傳媒組嘅亞軍就係個女仔，都幾 sharp 架，佢係 《車王》 嘅代表嚟嘅。最慳油嘅，當然係 1500 cc 及以下嘅組別啦，頭三名都係用咗 1 litre 左右，即係佢哋大概，平均毫半子行一公里！

每架參賽車都有個禮品包，入面啲嘢都幾實用架，有大會 t-shirt、手提電風扇、太陽帽之類，最正係送本 《地圖王》，2007 年版架。除咗比賽之外，仲有其他嘢玩，可以打 driving range，又有攤位遊戲，每人有張燒烤包券，可以換燒烤包自己燒，如果唔想自己燒，又有啲工作人員負責燒俾你哋任食。

為咗呢個比賽，我將我車尾所有嘢都搬晒番屋企，我 partner 就著背心、帶凍飲，做足準備。我全程都保持平穩，盡量行直線，避免剎掣過急，可惜响元朗段，因為唔熟路，又唔熟啲燈位有幾遠，所以用得多油咗，不過就算係咁，計落都比我平時用油量少一半以上。

嗰日比賽就話嗻，平時如果唔開冷氣，我 partner 實唔肯坐我車嗻。仲有其他相架，click 過去睇睇啦。