長洲 BBQ

尋日我哋一行三十人，浩浩蕩蕩出發去長洲，識咗好多新朋友，又見番啲舊朋友。有人話唔認得我 partner，佢只不過係電咗個頭，同帶咗副 con 嗻，竟然以為我換咗畫，唔係咁睇我呀嘛，哈哈。

由碼頭行去目的地，環境非常正，一望無際，响香港真係越來越罕有喇。食物方面當然係正啦，有大蝦、羊扒、牛扒、黑琢肉、豬頸肉，平時食開嘅腸呀、丸呀、粟米、蕃薯之類，亦都齊備，有相睇 BBQ。

一論狂風掃落葉，大家飲飽食醉，响度吹水之際，有人提起餘興節目係唱 K，咁我就梗係舉腳贊成啦。嗶！點知大家非常高效，即刻拎袋走人，坐快船番香港，再飛的嚟銅鑼灣 CEO。至於其他唔唱 K 嘅，就留响嗰度繼續飲吓、食吓、傾吓偈。

由下晝四點碼頭集合，玩到零晨四點離開 CEO，又玩足十二個鐘添。